Spillplazen am Wandel – Neies aus Koplescht & Briddel

D’Spillplazen an der Gemeng Koplescht veränneren sech. Ob um Schoulhaff, am Spillschoulsgaart oder bei der Maison Relais – iwwerall geschitt eppes, fir de Kanner nach méi Plaz ze gi fir ze spillen, z‘entdecken an ze rosen.

Frësche Wand um Schoulhaff

Wéinst de Renovatiounsaarbechte vun der Maison Relais an der Primärschoul um Briddel, gouf déi besteeënd Spillplaz deelweis zougemaach. Den zentrale Schoulhaff kritt en neie Belag, an zwar bis Enn dëst Joer an zwou Etappen. Fir dass d’Kanner trotzdeem aktiv kënne bleiwen, ginn zwee Fussballsgoler an zwee Basketballkierf installéiert. Zousätzlech si Buedemspiller geplangt, fir den Haff nach méi lieweg a faarweg ze gestalten.

Neien Elan am Spillschoulsgaart

Och bei der Spillplaz virun der Spillschoul stinn Ännerungen un: D’Spannennetz-Schaukel gëtt duerch eng nei Attraktioun ersat. Well de Buedem gegoss ass, ass en Austausch nëmme mat engem accordéierten an identesche Spill méiglech – dat mécht d’Aarbechte méi deier, méi opwänneg a méi zäitintensiv.

Natur pur bei der Maison Relais

Besonnesch spannend gëtt et bei der Maison Relais: Hei entsteet eng nei naturno Spillplaz. Haaptattraktioun gëtt de Weidentunnel, wou ee spillen, sech verstoppen oder einfach dreeme kann. Dräi nei Holzspiller fërderen d’Beweegung an d’Motorik, an am Insektenhotel kënne kleng Déieren entdeckt ginn.

Am Kraidergaart dierfen d’Kanner richen, schmaachen a beim Kachen nokucken – vläicht souguer hir eegen Zopp preparéieren. Sandkëscht a Buerbeswee stimuléieren d‘Fantasie an d‘Sënner a stäerken de Kierper a Geescht. An enger spéiderer Phas kommen eventuell och d’Hénger erëm zeréck – d’Kanner sollen dobäi un der Konzipéierung a Gestaltung matwierken an esou léieren, wouhier d’Eeër kommen, déi duerno an der Kichen verschafft ginn.

Méi Natur och an der Rue Camille Claudel

No deem selwechte Konzept wéi bei der Maison Relais ass och an der Rue Camille Claudel eng naturno Spillplaz geplangt. Bis elo gouf d’Topografie opgeholl – d’Virfreed dierf also wuessen.

Spillspaass zu Koplescht

Och d‘Spillplaz zu Koplescht gëtt erweidert: Dat neit Gitter gouf schonn installéiert, geschwë kommen nach zwee Holzspiller an eng Sandkëscht dobäi.

Déi verschidden Aarbechten si fir déi nächst Zäit virgesinn, hir konkret Ëmsetzung hänkt awer och vun de jeeweilegen Zouliwwerer an externe Firmen of.